اليوم غادي نوريكم كيفاش تصوبو انواع من الحليب من مصدر نباتي صحي و طبيعي احسن من الحليب لي كنشريو و ماعرفينش اش فيه.
حليب ديال اللوز :
هاد الحليب غني بالكالسيوم و الفيتامينات
الطريقة :
كتاخدي الكمية ديال اللوز لي بغيتي كترقديه ليلة كاملة فالما و من بعد تصفيه و تغسليه و تقشريه و ديريه فالمكسور حتى يطحن مزيان حتى يولي بحال العصيدة و من بعد زيدي ليه الما شوية بشوية حتى يتكون عندك الحليب على حساب الكثافة لي بغيتي. يمكن ليك تشربيه هاكاك و يمكن تنكهيه بماء زهر و العسل ديال التمر او الشوكولا و تقدري تستعمليه فالعصائر و ديريه لوليداتك مع الكورن فليكس و في الحلويات بحال الكريم باتسيير و الفلان...
الحليب ديال جوز الهند او الكوك:
هاد الحليب بالاضافة الى القيمة الغدائية ديالو فهو كيصلاح حتى للبشرة و الشعر
الطريقة:
كتاخدي 100غرام ديال الكوك و تزيدي ليه نص لتر ماء و تخليه يترقد ليلة كاملة و من بعد ديريه فوق العافية مهيلة مدة 5 دقايق و من بعد طفي عليه و خليه ربع ساعة عاد صفيه بزيف حياتي و ها هو الحليب واجد و استعمالات بحال الحليب ديال اللوز فالعصائر و الحلويات....
الحليب ديال الزنجلان:
هاد الحليب غني بالكالسيوم و الاملاح الامينية و المعادن
الطريقة :
كتاخدي 100 غرام ديال الزنجلان منقي ترقديه فالما ليلة كاملة و صفيه و طحنيه و انتي كتزيدي فالما حتى يتكون عندك الحليب و صفيه فثوب حياتي.
الحليب ديال الكركاع:
هاد الحليب مفيد للاطفال لانو كينمي الذكاء ديالهم.
الطريقة:
كترقدي 100 غرام ديال الكركاع رقديه فالما ليلة كاملة و صفيه و غسليه و طحنيه مع اضافة الما شوية بشويةبمقدار نص لتر و هاهو الحليب واجد.
الحليب ديال الحمص:
هاد الحليب غني جدا بالبروتينات و المعادن
الطريقة:
ترقدي 100 غرام ديال الحمص فالما ليلة كاملة و صفيه و طحنيه مزيان و زيدي ليه نص لتر ماء و خليه يطيب 20 دقيقة و خليه يبرد و عاود طحنيه و صفيه بزيف حياتي.
تقدري تستعمليه فالحسوة بلاصة الحليب العادي و فالشوربات و صوص بشاميل...
الحليب ديال إلان:
هاد الحليب غني جدا بالكالسيوم و المعادن
الطريقة:
نفس طريقة و استعمالات حليب الحمص
الحليب ديال الشعير:
100 غرام ديال الشعير مرقد ليلة كاملة صفيه و غسليه و زيدي ليه لتر من الما و خليه حتى يغلى و نقصي ليه العافية و خليه يطيب 10 دقايق و طحنيه و صفيه.
الحليب ديال الروز:
و هاد الحليب ارخص حليب و غني بالمعادن و سهل فالهظم خصوصا لأصحاب المعدة الضعيفة
الطريقة:
تقدري ديريه باي نوع ديال الروز عندك نفس الطريقة ديال الحليب ديال الشعير. غير الروز ديري 80 غرام و الما 1 لتر. هاد الحليب تقدري تستعمليه فصوص بيشاميل و فوصفة الحليب بالروز و فالمهلبية و فالحسوة
اوا هادي انواع ديال الحليب عزلي لي بغيتي و لا خلطي بين الانواع راه كلها صحية و امنة و طبيعية واللي عجباتها الوصفة دير لايك و اعولي بالشفاء
الإبتساماتإخفاء